សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់អំណោយដល់យុវតីរងគ្រោះ
នារសៀលថ្ងៃចន្ទ ១១រោច ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែមករា ឆ្នាំ២០២០ កាកបាទក្រហមកម្ពុជា ដែលមាន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យលោកជំទាវ សោម សេរីវឌ្ឍន៍ នាយិកា នាយកដ្ឋានធនធានមនុស្ស កក្រក និងមន្ដ្រីសាខា កក្រក រាជធានីភ្នំពេញ ចុះសាកសួរសុខទុក្ខ និងនាំយកអំណោយមនុស្សធម៌ ជូនយុវតី ស្រ៊ុន កែវមរកត អាយុ ១៦ ឆ្នាំ ជាយុវជន កក្រក និងជាសិស្សរៀនថ្នាក់ទី៨C1 នៃវិទ្យាល័យ ហ៊ុន សែន ប៊ុនរ៉ានី ផ្សារដេីមថ្កូវ ដែលរងគ្រោះដោយសារផ្ទុះអំពេីហិង្សាពីសំណាក់យុវតី ៤នាក់ វាយដំយ៉ាងដំណំ កាលពីថ្ងៃទី២៥ ខែធ្នូ ឆ្នាំ២០១៩ កន្លងទៅ។
ឆ្លៀតក្នុងឱកាសនោះដែរ លោកជំទាវក៏បានពាំនាំការផ្ដាំផ្ញេីសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិតប្រធាន ជូនចំពោះយុវតីរងគ្រោះ និងក្រុមគ្រួសារ ដែលរងទុក្ខដោយសារការវាយដំ បំពានលេីរាងកាយ និងផ្លូវចិត្តយ៉ាងព្រៃផ្សៃ ដោយចេតនាពីសំណាក់យុវតីទំនេីង ៤នាក់ ក្នុងនោះ យុវតី ១នាក់ កំពុងសិក្សានៅក្នុងវិទ្យាល័យជាមួយយុវតីរងគ្រោះ និងយុវតី ៣នាក់ទៀត ជាសិស្សមកពីវិទ្យាល័យខាងក្រៅ។ ទោះក្នុងកាលៈទេសៈណាក៏ដោយ បេីមានករណីរងគ្រោះនានា ដោយសាររំលោភបំពាន លេីរាងកាយ ផ្លូវចិត្ត ផ្លូវភេទ ពលរដ្ឋក្រីក្រ រងទុក្ខលំបាកនានាកាកបាទក្រហមកម្ពុជា តែងតែនៅជាមួយ ដោយមិនទុកនរណាម្នាក់ចោលឡេីយ។
ដេីម្បីជាការលេីកទឹកចិត្ត និងផ្ដល់កម្លាំងចិត្តដល់យុវតីរងគ្រោះ កុំឱ្យបាក់ទឹកចិត្ត មានវិបត្តិផ្លូវចិត្តពីការគំរាមកំហែង កាកបាទក្រហមកម្ពុជា ផ្ដល់នូវអំណោយមួយចំនួនរួមមាន មីជាតិ ១កេស ត្រីខ ១០កំប៉ុង ស្កសរ ២គីឡូក្រាម ទឹកដោះគោឆៅ ១ឡូ ឃីត១(សារ៉ុង១ ក្រមា១ មុង១ ភួយ១) និងថវិកាមួយចំនួនផងដែរ៕
