មហាជនចង់អោយសមត្ថកិច្ចហៅលោក ហេង ឡុង និង K01 មកអប់រំ
បន្ទាប់ពីសមត្ថកិច្ចបានកោះហៅ អ្នកបង្ហោះព័ត៌មានមិនពិតតាមបណ្តាញសង្គមហ្វេសប៊ុក ពាក់ព័ន្ធនឹងជំងឺផ្លូវដង្ហេីមវីរុសកូរ៉ូណា មកធ្វើការអប់រំនិងធ្វើកិច្ចសន្យាជាបន្តបន្ទាប់ មហាជនបានគាំទ្រយ៉ាងខ្លាំង ។ ទន្ទឹមនឹងការគាំទ្រសមត្ថកិច្ច មហាជនក៏ដាក់ជាដំណួរសួរថា ចុះ ករណី លោក ហេង ឡុង និង លោក K01 ដែលផ្សាយព័ត៌មានមនពិត ហេតុអ្វីបានជាមិនទាន់ឃេីញសមត្ថកិច្ចបានកោះហៅមកធ្វើការអប់រំនិងធ្វើកិច្ចសន្យាដែរ ?
លោក ហេង ឡុង នៅថ្ងៃទី ២៧ ខែ មករា ឆ្នាំ ២០២០ បានបង្ហោះវីដេអូ បុគ្គលិក កាស៉ីណូម្នាក់ដែលមានជំងឺខ្វះជាតិស្ករថាជា អ្នកសង្ស័យឆ្លងមេរោគផ្លូវដង្ហេីម វីរុស កូរ៉ូណា ។ បន្ទាប់ពីមានការរិះគន់មក លោក ហេង ឡុង ក៏លប់វីដេអូនោះចេញវិញ និងបានបង្ហោះសារសុំទោសចំពោះកំហុសឆ្គងនោះ ។
ចំណែក K01 នៅព្រឹកថ្ងៃទី ២៩ ខែ មករា ឆ្នាំ ២០២០ បានទៅថតផ្សាយបន្តផ្ទាល់នៅមុខមន្ទីរពេទ្យរ៉ូស្សី បង្រអោយភ្ញាក់ផ្អេីលទាំងព្រឹក ។ ក្រោយមកក៏លប់វីដេអូនោះចេញវិញបន្ទាប់ពីប្រធានមន្ទីរពេទ្យមិត្តភាពកម្ពុជា-រ៉ូស្ស៉ី និង ប្រធានមន្ទីរសុខាភិបាលរាជធានីភ្នំពេញ បដិសេធ ។
ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានស្នេីសុំអោយអាជ្ញាធរចាត់វិធានការតាមច្បាប់ចំពោះអ្នកផ្សាយព័ត៌មានមិនពិតអំពីជម្ងឺផ្លូវដង្ហេីមថ្មីបង្ករអោយប្រជាពលរដ្ឋមានការភ័យខ្លាច ។
នៅថ្ងៃទី ២៨ ខែ មករា ឆ្នាំ ២០២០ មនុស្ស ៣ នាក់ហេីយត្រូវបានសមត្ថកិច្ចហៅមកធ្វេីការអប់រំ និងធ្វើកិច្ចសន្យាឈប់ផ្សាយព័ត៌មានមិនពិត ។ ក្នុងនោះខេត្តសៀមរាប ២ នាក់ ខេត្តកោះកុង ១នាក់ ។
