វេទិកាចិន-អាស៊ានលើកឡើងអំពីសាមគ្គីភាព និងការអភិវឌ្ឍ

វេទិកា Think Tank កម្រិតខ្ពស់រវាងចិន-អាស៊ាន ត្រូវបានប្រារព្ធធ្វើឡើងកាលពីថ្ងៃសៅរ៍នៅទីក្រុងហៃគូនៃខេត្តហៃណាននៅភាគខាងត្បូងប្រទេសចិន។

ជាមួយនឹងប្រធានបទនៃការធ្វើការងារដោយសាមគ្គីភាព និងផ្តោតសំខាន់ទៅលើការអភិវឌ្ឍដើម្បីលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន-អាស៊ាន ក្រុមអ្នកនយោបាយ និងអ្នកជំនាញជាង ២០០នាក់មកពីប្រទេសចិន និងបណ្តាប្រទេសនៅអាស៊ាន បានចែករំលែកមតិគ្នាទាំងក្នុង និងក្រៅប្រព័ន្ធអនឡាញនៅក្នុងវេទិកាដែលមានរយៈពេលមួយថ្ងៃនោះ។

កិច្ចប្រជុំពិសេសស្តីពីកំពង់ផែពាណិជ្ជកម្មសេរីហៃណាន ការធ្វើឱ្យស៊ីជម្រៅនៃទំនុកចិត្តជាយុទ្ធសាស្រ្តរវាងចិន-អាស៊ាន និងកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-អាស៊ាន ក៏ត្រូវបានប្រារព្ធធ្វើឡើងនៅក្នុងវេទិកានោះផងដែរ។

លោក Wang Jiarui ប្រធានមូលនិធិ China Soong Ching Ling បាននិយាយនៅក្នុងពិធីបើកវេទិកានោះថា ចាប់តាំងពីប្រទេសចិន និងអាស៊ានបានបង្កើតទំនាក់ទំនងកិច្ចសន្ទនារបស់ពួកគេកាលពី ៣០ឆ្នាំមុនមក កិច្ចសហប្រតិបត្តិការលើគ្រប់វិស័យរវាងភាគីទាំងពីរបានផ្តល់នូវការជំរុញយ៉ាងខ្លាំងដល់ការអភិវឌ្ឍវប្បធម៌ សេដ្ឋកិច្ច និងសង្គម ដោយនាំមកនូវផលប្រយោជន៍ជាក់ស្តែងដល់ប្រជាជនជាង ២ប៊ីលាននាក់នៅក្នុងប្រទេសចំនួន ១១ និងបានរួមចំណែកយ៉ាងធំធេងដល់សន្តិភាព ស្ថេរភាព និងវិបុលភាពនៅក្នុងតំបន់ និងក្នុងពិភពលោក។

ក្នុងរយៈពេលបីទសវត្សរ៍កន្លងមកនេះ ពាណិជ្ជកម្មរវាងចិន និងអាស៊ានបានកើនឡើងដល់ទៅ ៨៥ដង។ កាលពីឆ្នាំមុន ប្រទេសចិននៅតែជាដៃគូពាណិជ្ជកម្មដ៏ធំបំផុតរបស់អាស៊ានសម្រាប់រយៈពេល ១២ឆ្នាំជាប់ៗគ្នា ខណៈដែលអាស៊ានបានក្លាយជាដៃគូពាណិជ្ជកម្មធំបំផុតរបស់ចិន។

លោក Ong Tee Keat ប្រធានមជ្ឈមណ្ឌលសម្រាប់ការរួមបញ្ចូលថ្មីអាស៊ីបាននិយាយថា «អាស៊ានបានវ៉ាដាច់សហភាពអឺរ៉ុបជាលើកដំបូងក្នុងការក្លាយជាដៃគូពាណិជ្ជកម្មដ៏ធំបំផុតរបស់ប្រទេសចិន ចំពេលដែលមានការដួលរលំសេដ្ឋកិច្ចដែលបណ្តាលមកពីជំងឺកូវីដ-19 កាលពីឆ្នាំមុន។ ជាការពិតណាស់ ជំងឺរាតត្បាតនេះបានពង្រឹងចំណងសាមគ្គីភាព និងភាពអាស្រ័យទៅលើសេដ្ឋកិច្ចយ៉ាងខ្លាំងរវាងចិន និងអាស៊ាន»៕