សេចក្តីជូនដំណឹង៖ ស្តីពីស្ថានភាពធាតុអាកាសចាប់ពីថ្ងៃទី២០ ដល់ ២៦ ខែមេសា ឆ្នាំ២០២២
ក្រសួងធនធានទឹក និងឧតុនិយមបានជូនដំណឹងស្តីពីស្ថានភាពធាតុអាកាសនៅកម្ពុជា ចាប់ពីថ្ងៃទី២០-២៦ ខែមេសា ឆ្នាំ២០២២ ថាកម្ពុជានឹងទទួលឥទ្ធិពលពីទ្រនុងសម្ពាធខ្ពស់(ប៉ាស៊ីហ្វិក)និងកម្រិតសម្ពាធទាបខ្សោយ។
ស្ថានភាពបែបនេះ នឹងអាចធ្វើឱ្យបណ្តាខេត្តនៅតាមតំបន់វាលទំនាបកណ្តាល អាចមានភ្លៀងក្នុងកម្រិតពីខ្សោយទៅមធ្យម លាយឡំ ផ្គរ រន្ទះនិងខ្យល់កន្ត្រាក់។ ផងដែរនោះ តំបន់ខ្លះក៏អាចមានភ្លៀងច្រើនជាបង្គួរផងដែរ។
ចំនែកឯ នៅបណ្តាខេត្តជាប់ជួរភ្នំដងរែក និងខ្ពង់រាបឦសាន អាចមានភ្លៀងក្នុងកម្រិតពីខ្សោយទៅមធ្យមដោយអន្លើ លាយឡំ ផ្គរ រន្ទះ និងខ្យល់កន្ត្រាក់ ផងដែរ។ ហើយនៅតំបន់មាត់សមុទ្រវិញ អាចមានភ្លៀងក្នុងកម្រិតពីខ្សោយទៅមធ្យម លាយឡំ ផ្គរ រន្ទះ និងខ្យល់កន្ត្រាក់។ យ៉ាងណាមិញ ក្នុងខេត្តកោះកុងអាចទទួលនូវបរិមាណទឹកភ្លៀងច្រើនជាងគេ។
អាស្រ័យដោយស្ថានភាពអាកាសធាតុបែបនេះ ក្រសួងធនធានទឹកនិងឧតុនិយម បានប្រកាសឱ្យប្រជាពលរដ្ឋទាំងអស់ប្រុងប្រយ័ត្នចំពោះបាតុភូតធម្មជាតិ ដែលអាចកើតមានជាយថាហេតុ៕
នេះបើយោងតាមសេចក្តីជូនដំណឹងក្រសួងធនធានទឹក និងឧតុនិយម នៅថ្ងៃទី១៩ ខែមេសា ឆ្នាំ២០២២ នេះ។
