កីឡាការិនីប៉េតង់កម្ពុជា អ៊ុក ស្រីមុំ ឈ្នះមេដាយមាសកីឡាពិភពលោក នៅសហរដ្ឋអាមេរិក
ភ្នំពេញ៖ ថ្ងៃទី១៣ ខែកក្កដា ឆ្នាំ២០២២ កីឡាការិនីប៉េតង់កម្ពុជា អ៊ុក ស្រីមុំ បានឈ្នះមេដាយមាស ដែលជាកំណត់ត្រាប្រវត្តិសាស្ត្រថ្មីមួយ សម្រាប់ការចូលរួមលើកដំបូងនៅព្រឹត្តិការណ៍កីឡាពិភពលោក (World Games Birmingham, USA) នៅទីក្រុង Birmingham រដ្ឋ Alabama សហរដ្ឋអាមេរិក បន្ទាប់ពីបានយកឈ្នះកីឡាការិនីម្ចាស់ផ្ទះសហរដ្ឋអាមរិក Rebecca នៅវគ្គផ្តាច់ព្រ័ត្រ ដោយលទ្ធផល ៤១ទល់២១ នៅព្រឹកព្រលឹម (ម៉ោងនៅកម្ពុជា) ថ្ងៃ១៥កើត ខែអាសាឍ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃពុធ ទី១៣ ខែកក្កដា ឆ្នាំ២០២២នេះ។
មុនឈានដល់វគ្គផ្តាច់ព្រ័ត្រ កីឡាការិនីប៉េតង់ដ៏ឆ្នើមរបស់កម្ពុជា អ៊ុក ស្រីមុំ ធ្វើបានយ៉ាងល្អ នៅវគ្គជម្រុះ ក្នុងចំណោមកីឡាការិនីមកពី៨ប្រទេស ដូចជា ប្រទេសកាណាដា, បារំាង, កម្ពុជា, ដាណឺម៉ាក, ប៊ែលហ្ស៊ីក, អាល្លឺម៉ង់, សហរដ្ឋអាមេរិក, និងប្រទេសថៃ ហើយកម្ពុជាឈរនៅចំណាត់ថ្នាក់លេខ១ ក្នុងជុំទី២។ ចំពោះលទ្ធផលការប្រកួតវគ្គពាក់កណ្ដាលផ្ដាច់ព្រ័ត្រ កីឡាការិនីថៃ បានប្រកួតចាញ់ជាមួយកីឡាការិនីអាម៉េរិក ៣៧ទល់៣៨ ខណៈកម្ពុជាបានយកឈ្នះ ដាណឺម៉ាក ដោយលទ្ធផល ៣៧ទល់២៣។ ជាមួយនឹងជ័យជម្នះនៅវគ្គពាក់កណ្តាលផ្តាច់ព្រ័ត្រ កីឡាការិនីកម្ពុជា អ៊ុក ស្រីមុំ បានឡើងមកប៉ះជាមួយកីឡាការិនីម្ចាស់ផ្ទះអាម៉េរិក Rebecca នៅវគ្គផ្ដាច់ព្រ័ត្រ ហើយកីឡាការិនី អ៊ុក ស្រីមុំ ដណ្ដើមបានមេដាយមាសតែម្តង ជាមួយនឹងលទ្ធផលដ៏ល្អ ៤១ទល់២១។ អ្វីជាការកត់សម្គាល់ ក្នុងរយៈពេល២ឆ្នាំចុងក្រោយនេះ (២០២១-២០២២) កីឡាការិនី អ៊ុក ស្រីមុំ បានឈ្នះមេដាយមាស២គ្រឿងជូនជាតិ ពីការប្រកួតជើងឯកពិភពលោក ឆ្នាំ២០២១ នៅប្រទេសអេស្ប៉ាញ និងកីឡាពិភពលោកនៅសហរដ្ឋអាមេរិក នាពេលនេះ។
បើតាមការបញ្ជាក់ពីកញ្ញា គិន សំណាង អគ្គលេខាធិការ សហព័ន្ធកីឡាប៊ូល និងប៉េតង់កម្ពុជាដែលកំពុងដឹកនាំប្រតិភូកីឡាប៉េតង់កម្ពុជា ចូលរួមប្រកួតកីឡាពិភពលោក នៅសហរដ្ឋអាមេរិកបានាឱ្យដឹងថា ដោយមានជាង១០០ប្រទេសចូលរួម និងមាន៣៤ប្រភេទកីឡា ខណៈកម្ពុជាបានបញ្ជូន១ប្រភេទកីឡាប៉េតង់កម្ពុជាចូលរួម (កីឡាការិនី២នាក់ លេង២វិញ្ញាសា)។ នេះជាការចូលរួមជាលើកដំបូងរបស់កម្ពុជា ហើយក៏ជាលើកដំបូងរបស់ប្រភេទកីឡាប៉េតង់កម្ពុជាផងដែរ ហើយកម្ពុជាបានកសាងកំណត់ត្រាជាប្រវត្តិសាស្ត្រថ្មីមួយ នៅក្នុងការប្រកួតកីឡាពិភពលោក ដែលប្រារព្ធធ្វើឡើងរៀងរាល់ ៤ឆ្នាំម្តង។
កម្ពុជានៅសល់១ប្រកួតទៀតក្នុងដៃ លើប្រភេទកីឡាប៉េតង់ដដែលនេះ លើវិញ្ញាសា ២នាក់ទល់២នាក់ ដោយកីឡាការិនី អ៊ុក ស្រីមុំ ចាប់ដៃគូជាមួយកីឡាការិនី អ៊ុន ស្រីយ៉ា។ វិញ្ញាសានេះមាន៨ប្រទេសចូលរួម ដោយចែកចេញជាពីរពូល ដោយកម្ពុជាស្ថិតនៅក្នុងពូល ជាមួយកាណាដា, បារាំង, ដាណឺមាក, រីឯពូល១ទៀត រួមមាន អាល្លឺម៉ង់, ប៊ែលហ្សិក, ថៃ, និងម្ចាស់ផ្ទះអាម៉េរិក។ ការប្រកួតនេះនឹងស្វែងរកក្រុមចំណាត់ថ្នាក់លេខ១ និងលេខ២នៃពូលទាំងពីរ ឡើងប្រកួតខ្វែង នៅវគ្គពាក់កណ្តាលផ្តាច់ព្រ័ត្រ ហើយ២ក្រុមឈ្នះៗ នឹងបានឡើងទៅដណ្តើមមេដាយមាស៕
ប្រភព៖ ក្រសួងព័ត៍មាន