បាញ់ទៀតហើយ! ដកកាំភ្លើងខ្លីបាញ់ឡើងលើចំនួន៤គ្រាប់ រំខានដល់សមត្ថកិច្ចដើររើសសំបកកាទុស្សទាំងយប់

ភ្នំពេញ៖ ជនទំនើង២នាក់ជិះម៉ូតូឌុបគ្នា ប្រហែលជាអផ្សុកពេក ក៍បានដកកាំភ្លើងខ្លីបាញ់មេឃចំនួន៤គ្រាប់ រួចបើកគេចខ្លួនបាត់ស្រមោល រវល់ដល់កម្លាំងសមត្ថកិច្ចចុះទៅរើសសំបកកាទុស្សមកទុក ដើម្បីស្រាវជ្រាវវែកមុខខ្មាន់កាំភ្លើង ។

ករណីបាញ់បោះសេរីនេះ បានកើតឡើង កាលពីវេលាម៉ោង៣ និង៣០នាទីទៀបភ្លឺ ថ្ងៃទី០២ ខែកញ្ញា ឆ្នាំ២០២០ តាមបណ្តោយផ្លូវ២៨៧ កែងផ្លូវ៥២៨ ស្ថិតនៅក្នុងសង្កាត់បឹងកក់១ ខណ្ឌទួលគោក ។

ប្រភពកើតហេតុ បានឲ្យដឹងថា នៅមុនពេលកើតហេតុ គេបានឃើញបុរសមិនស្គាល់អត្តសញ្ញាណ២នាក់ បានជិះម៉ូតូ១គ្រឿងម៉ាកស៊ុយហ្ស៊ុយគីនិច មិនចាំផ្លាកលេខ ឌុបគ្នាមកដល់ចំណុចកើតហេតុ ស្រាប់តែដកកាំភ្លើងខ្លីមិនស្គាល់ម៉ាកពីចង្កេះ បាញ់ឡើងទៅលើចំនួន៤គ្រាប់ រួចហើយជិះរត់គេចខ្លួនបាត់ស្រមោល ។

ក្រោយពេលកើតហេតុ សមត្ថកិច្ចប៉ុស្តិ៍បឹងកក់១ បានចុះមកដល់កន្លែងកើតហេតុ រើសយកសំបកកាទុស្សបានចំនួន៣គ្រាប់យកទៅរក្សាទុក ដើម្បីធ្វើការស្រាវជ្រាវរកមុខខ្មាន់កាំភ្លើង និងចាប់ខ្លួននាំមកផ្តន្ទាទោសតាមផ្លូវច្បាប់៕