លោកតា អ៉ិន ឆេង អាយុ ៨៥ ឆ្នាំ ទទួលបានចម្លើយពីមន្ត្រីក្រសួងមហាផ្ទៃខ្លះហេីយ បន្ទាប់ពីបាត់ដំណឹងជាង ២ ឆ្នាំ
លោកតា អ៉ិន ឆេង អាយុ ៨៥ ឆ្នាំ ជាប្រជាពលរដ្ឋរស់នៅភូមិ ស្លាបតាអោន ឃុំ គគីរ ស្រុក កៀនស្វាយ ខេត្ត កណ្ដាល ។ ក្រោយថ្ងៃរំដោះ ៧ មករា ១៩៧៩ លោកតា អ៉ិន ឆេង និង ក្រុមគ្រួសារ បានមករស់នៅលេីផ្ទះ និង ដី ទំហំ ១៤ ម៉ែត្រ គុណនឹង ១៧០ ម៉ែត្រ មានទីតាំងជាប់ផ្លូវលេខ ១ ភូមិ ស្លាបតាអោន ឃុំ គគីរ ស្រុក កៀនស្វាយ ខេត្ត កណ្ដាល ។
លុះដល់ឆ្នាំ ១៩៨១ លោកតា ចាន់ ប៉ិច មេភូមិ ស្លាបតាអោន បានមកសុំខ្ចីផ្ទះលោកតា អ៉ិន ឆេង ធ្វើជាទីស្នាក់ការភូមិ ។ ក្នុងចន្លោះពេលដែល លោកតា ចាន់ ប៉ិច ខ្ចីផ្ទះលោកតា អ៉ិន ឆេង ធ្វើជាទីស្នាក់ការភូមិ លោកតា អ៉ិន ឆេង និង ក្រុមគ្រួសារ ក៏នៅលេីផ្ទះដដែលនេះដែរ ។ នៅឆ្នាំ ១៩៩០ លោកតា អ៉ិន ឆេង បានធ្វើពាក្យសុំកាន់កាប់ដោយមានបង្កាន់ដៃទទួលស្គាល់ដោយកសិកម្មស្រុក លេខ ១៧៤៤៦ ចុះថ្ងៃទី ២៥ ខែ កក្កដា ឆ្នាំ ១៩៩០ ។
លុះដល់ឆ្នាំ ១៩៩៨ ភូមិបានរេីទីស្នាក់ចេញពីផ្ទះលោកតា អ៉ិន ឆេង ទៅនៅទីតាំងផ្សេង ។ លោកតា អ៉ិន ឆេង និង ក្រុម គ្រួសារ នៅតែបន្តរស់នៅលេីផ្ទះ និង ដី របស់គាត់រហូតមកដល់បច្ចុប្បន្ន ។
ការរស់នៅ កាន់កាប់ ប្រេីប្រាស់ ដីធ្លី ផ្ទះសំបែងរបស់គាត់នៅភូមិ ស្លាបតាអោន ឃុំ គគីរ ស្រុក កៀនស្វាយ ខេត្ត កណ្ដាល តាំងពី ១៩៧៩ រហូតដល់ឆ្នាំ ២០១៧ មិនដែលមានបុគ្គលណាមករករឿងឡេីយ ។ លុះពេល លោកតា ដាក់ពាក្យស្នេីសុំធ្វេីបណ្ណកម្មសិទ្ធិ ស្រាប់តែមានមន្ត្រីភូមិ ឃុំ បច្ចុប្បន្ន ទាមទារអោយលោកតា លក់ដី និង ផ្ទះ យកលុយចែកគ្នា ។ ប៉ុន្តែ លោកតា អ៉ិន ឆេង មិនព្រម ស្រាប់តែមន្ត្រីភូមិឃុំ ឃុបឃិតយកដី និង ផ្ទះរបស់លោកតា អ៉ិន ឆេង ដាក់ជាទ្រព្យសម្បត្តិរដ្ឋតែម្ដង ។
ដោយមេីលឃេីញនូវអំពេីអយុត្តិធម៌បែបនេះ នៅថ្ងៃទី ១៦ ខែ តុលា ឆ្នាំ ២០១៧ លោកតា អ៉ិន ឆេង បានធ្វើពាក្យសុំអន្តរាគមន៍គោរពចូលទៅ ឯកឧត្តមអភិបាលខេត្តកណ្ដាល ដេីម្បីបានចុះបញ្ជីដីធ្លីធ្វេីបណ្ណកម្មសិទ្ធិស្របច្បាប់ ។
នៅថ្ងៃទី ២៩ ខែ មិថុនា ឆ្នាំ ២០១៨ ឯកឧត្ដម អភិបាល ខេត្ត កណ្ដាល បានធ្វើលិខិតសុំអន្តរាគមន៍ទៅ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ដេីម្បីគោរពសុំគោលការណ៍ពីសម្ដេចក្រឡាហោម ស ខេង កាត់ចេញពីបញ្ជីសារពេីភ័ណ្ឌ ប្រគល់ជូនលោកតា អ៉ិន ឆេង វិញ ។
ចាប់តាំងពីលិខិតរបស់ឯកឧត្តមអភិបាលខេត្តកណ្ដាល ដាក់ចូលទៅដល់ក្រសួងមហាផ្ទៃនៅថ្ងៃទី ១៨ ខែ កក្កដា ឆ្នាំ ២០១៨ លោកតា អ៉ិន ឆេង បានរង់ចាំដំណឹងរហូត តែមិនទាន់បានលទ្ធផលអ្វីទេបេីគិតមកត្រឹមថ្ងៃទី ៥ ខែ កញ្ញា ឆ្នាំ ២០២០ នេះ ។
ក្រៅពីការបញ្ជាក់អះអាងពីលោកតា អ៉ិន ឆេង ថា ផ្ទះ និងដី ដែលមានទំហំ ១៤ ម៉ែត្រ គុណនឹង ១៧០ម៉ែត្រ មានទីតាំងស្ថិតនៅជាប់ផ្លូវលេខ ១ ភូមិ ស្លាបតាអោន ឃុំ គគីរ ស្រុក កៀនស្វាយ ខេត្ត កណ្ដាល លោកតា មានបង្កាន់ដៃកាន់កាប់ត្រឹមត្រូវទទួលស្គាល់ដោយការិយាល័យកសិកម្មស្រុក ចុះថ្ងៃទី ២៥ ខែ កក្កដា ឆ្នាំ ១៩៩០ ទៀតផង ។ លេីសពីការបញ្ជាក់អះអាង និង បង្កាន់ដៃកាន់កាប់ត្រឹមត្រូវនេះ លោកតា ចាន់ ប៉ិច អតីតមេភូមិ ស្លាបតាអោន ជាសាក្សីរស់ ដែលជាអ្នកមកខ្ចីផ្ទះ លោកតា អ៉ិន ឆេង ធ្វើជាទីស្នាក់ការភូមិ ក៏បានធ្វើលិខិតបញ្ជាក់ការពិតផងដែរ ហេីយប្រជាពលរដ្ឋរាប់សិបនាក់ ចាស់ៗដែលរស់នៅភូមិ ស្លាបតាអោន ឃុំ គគីរ ស្រុក កៀនស្វាយ ជិតផ្ទះលោកតា អ៉ិន ឆេង តាំងពីឆ្នាំ ១៩៧៩ មក សុទ្ធតែបានផ្ដិតមេដៃបញ្ជាក់អះអាងបន្ថែមថា ផ្ទះ និងដី ទំហំ ១៤ម៉ែត្រគុណនឹង ១៧០ ម៉ែត្រ ស្ថិតនៅភូមិ ស្លាបតាអោន ឃុំ គគីរ ស្រុក កៀនស្វាយ ខេត្ត កណ្ដាល ពិតជារបស់លោកតា អ៉ិន ឆេង ប្រាកដមែន ។
កន្លងមក មានមន្ត្រីមួយចំនួនបានចុះទៅស៊េីបអង្កេតស្រាវជ្រាវករណីនេះផងដែរ ប៉ុន្តែ មន្ត្រីទាំងនោះ មិនបានសាកសួរម្ចាស់ដី មិនបានសាកសួរសាក្សីរស់នៅជុំវិញផ្ទះលោកតា អ៉ិន ឆេង ទេ គឺទៅជួបតែមេភូមិ មេឃុំ យករបាយការណ៍ត្រលប់មកវិញតែម្ដង ។
តេីការរៀបរាប់ព័ត៌មានត្រួសៗខាងលេីរបស់លោក ផែង វណ្ណៈ គ្មានមូលដ្ឋានត្រឹមត្រូវឬ ? តេីរបាយការណ៍ ដែលអស់លោកអះអាងថា មានមូលដ្ឋានត្រឹមត្រូវជាអ្វី ? ហេីយលទ្ធផលចុងក្រោយមានបែបណាចំពោះលោកតា អ៉ិន ឆេង ដែលជាម្ចាស់ផ្ទះនិងដីស្របច្បាប់ ?
បេីមន្ត្រីដែលមានភារកិច្ចចុះស៊េីបអង្កេតស្រាវជ្រាវ គ្មានចិត្តស្មោះត្រង់ និងយកតែរបាយការណ៍ភូតកុហករាយការណ៍ជូនថ្នាក់ដឹកនាំ ថ្នាក់ដឹកនាំមិនអាចសម្រេចចិត្តប្រកបដោយយុត្តិធម៌ត្រឹមត្រូវនោះទេ ។
ដូច្នេះក្រុមការងារស៊េីបអង្កេតស្រាវជ្រាវ គួរតែអញ្ជើញ លោកតា អ៉ិន ឆេង លោកតា ចាន់ ប៉ិច និង ប្រជាពលរដ្ឋ ចាស់ៗ នៅភូមិ ឃុំ ខាងលេីទៅសាកសួរនៅក្រសួងមហាផ្ទៃ នឹងរកការពិតឃេីញជាក់ជាពុំខាន ។ តេីករណីផ្ទះ និង ដី របស់លោកតា អ៉ិន ឆេង មានអ្វីស្មុគស្មាញ បេីមន្ត្រីភូមិ ឃុំ ជាអ្នកឃុបឃិតយកដាក់ជាសម្បត្តិរដ្ឋនោះ ?
សរុបសេចក្ដីមក រហូតមកដល់ពេលនេះ លោកតា អ៉ិន ឆេង មិនទាន់ទទួលបានយុត្តិធម៌ពិតប្រាកដពីថ្នាក់ដឹកនាំក្រសួងមហាផ្ទៃនៅឡេីយទេ ។
