ឃាត់ខ្លួនជនសង្ស័យ០២នាក់ករណីធ្វើឲ្យខូចខាតដល់បូជនីយដ្ឋានសាសនា ឬ បូជនីយដ្ឋានវត្ថុក្នុងព្រះពុទ្ធសាសនា

មានករណីធ្វើឲ្យខូចខាតដល់បូជនីយដ្ឋានសាសនា ឬ បូជនីយដ្ឋានវត្ថុក្នុងព្រះពុទ្ធសាសនាមួយ​​បានកើតឡើងនៅ ថ្ងៃទី ១៧ ខែវិច្ឆិកា ឆ្នាំ ២០២០ វេលាម៉ោង៩.០០នាទីព្រឹកនៅចំណុចលើភ្នំ ក្នុងបរិវេណ វត្តបាសិតត្រៃត្រឹង្ស ភូមិតាពិជ ឃុំ ឈ្វាំង ស្រុក ពញាឮ ខេត្ត កណ្តាល។

ឃាត់ខ្លួនជនសង្ស័យ០២នាក់ ១.ឈ្មោះ គង់ សំណាង ភេទ ប្រុស អាយុ៣៩ឆ្នាំជនជាតិ ខ្មែរ មុខរបរ មិនពិតប្រាកដ មានស្រុកកំណើតភូមិ បាក់រនាស់ ឃុំ សង្ឃ័រ ស្រុកស្វាយទៀប ខេត្ត ស្វាយរៀង ។ ទីលំនៅបច្ចុប្បន្នស្នាក់នៅភូមិ ព្រៃពង្រ សង្កាត់ ពញាពន់ ខណ្ឌ ព្រែកព្នៅ រាជធានី ភ្នំពេញ ជាជនដៃដល់ ។

២.ឈ្មោះប៊ិន សុភា ភេទប្រុស អាយុ ៣៩ឆ្នាំជនជាតិ ខ្មែរ មុខរបរ រត់តាក់ស៊ី មានទីលំនៅភូមិ ត្រពាំងស្វាយ សង្កាត់ គោកឃ្លាង ខណ្ឌ សែនសុខ រាជធានី ភ្នំពេញ(អ្នកបើកបរ)។

វត្ថុតាងដែលបានចាប់យកមានរថយន្តម៉ាក LEXUS ពណ៌ ប្រផេះផលិតឆ្នាំ២០០៣ ស្លាកលេខ 2AV.9545 -សោរថយន្ត០១ កូនសោរ ០២ -ទូរស័ព្ទ០១គ្រឿងម៉ាក iPhone ។

ជនសង្ស័យបានធ្វើអោយសម្ភារខូចខាតដូចជា រូបសំណាក់ព្រះនាងគ្រប់លក្ខណ៍ ០១ -រូបសំណាក់ព្រះនាងពៅ ០១ -រូបសំណាក់កុមារពេជ្រ ០១ -រូបសំណាក់ព្រះអង្គចេក ០១ -ព្រះក្លស្ស ០៣ -ថូផ្កា ០១ -ពាង ០២ -បង្គោលសូឡា ០១ -គ្រឿងបាយសីមួយចំនួន -រូបសំណាក់ព្រះនាងទេពប្រណម្យ ០៤ – ក្បាលនាគ ០២ -ខ្ទមអ្នកតា ០១ -របារដែកទ្វាព្រះវិហារ ០២ ។

គួរបញ្ជាក់ផងដែរថា ករណីនេះត្រូវបានលោក សូត្រ ស៊ីម អាយុ ៦៦ ឆ្នាំ ដែលមានមុខងារ ជាមន្រ្តីវប្បធម៌ អភិរក្សភ្នំបាសិត បានតេទូរសព្ទ័រាយការណ៍ មកប៉ុស្តិ៍នគរបាលរដ្ឋបាល ឃុំឈ្វាំង ថា មានជនសង្ស័យ០២នាក់ បានជិះរថយន្តម៉ាក LUXUS ពណ៌ ប្រផេះ ផលិតឆ្នាំ ២០០៣ ពាក់ស្លាកលេខ ភ្នំពេញ 2AV9845 មកឈប់លើភ្នំបាសិទ្ធត្រៃត្រឹង្សត្រង់បរិវេណវត្ត ហើយក្នុងនោះមានជនសង្ស័យម្នាក់ឈ្មោះគង់ សំណាង បានបើកទ្វារចេញពីក្នុងរថយន្តរត់សំដៅទៅលើព្រះវិហារ លើភ្នំវត្តបាសិតត្រៃត្រឹង្ស រួចធ្វើសកម្មភាព ធាក់ទ្វារព្រះវិហារ បណ្តាលឲ្យបាក់របាទ្វារ

បន្ទាប់មកជនសង្ស័យ បានរត់ចុះពី លើព្រះវិហារ មកធ្វើសកម្មភាព វាយបំផ្លិចបំផ្លាញរូបសំណាក់ ព្រះនាងទេពប្រណម្យ០៤ និង ខ្ទមអ្នកតា ០១ រួចចុះតាមជណ្តើរ ទាញបំបាក់បង្គោលសូឡា និង ធាក់ក្បាលនាគ០២ បំបាក់ចោល បន្ទាប់មកទៀតជនសង្ស័យបានរត់ចូលទៅក្នុងប្រាសាទស្រីគ្រប់លក្ខណ៍ វាយបំផ្លិចបំផ្លាញរូបសំណាក់ក្នុងប្រាសាទ រួមមាន៖ រូបសំណាក់ស្រីគ្រប់លក្ខណ៍០១ រូបសំណាក់ព្រះនាងពៅ ០១រូបសំណាក់កុមារពេជ្រ០១ រូបសំណាក់ព្រះអង្គចេក០១ និងលើកបោះបាយ សីចោលហើយជនសង្ស័យបានវាយថូផ្កា និង ពាងទឹកបែកអស់០២ ដែលនៅក្បែរប្រាសាទ។

បន្ទាប់ពីទទួលបានព័ត៌មានភ្លាមកម្លាំងប៉ុស្តិ៍នគរបាលឈ្វាំង សហការជាមួយកម្លាំងផ្នែកនគរបាលយុត្តិធម៌ ចុះទៅកន្លែងកើតហេតុឃាត់ខ្លួនជនសង្ស័យទាំង០២នាក់ និងមធ្យោបាយធ្វើដំណើរ រថយន្ត បញ្ជូនមកអធិការដ្ឋាននគរបាលស្រុកពញាឮ ដើម្បីសាកសួរ និងបន្តចាត់ការតាមនីតិវិធី។

ប្រភព៖ ស្នងការដ្ឋាននគរបាលខេត្តកណ្តាល