ឧត្ដមសេនីយ៍ទោ បាន ប្រាក់ មន្រ្តីយោធាជាន់ខ្ពស់ក្រសួងការពាជាតិ រងការចោទប្រកាន់ថាបានប្រេីប្រាស់ឯកសារក្លែងក្លាយ និង ក្លែងលិខិតឯកជន
កណ្តាល ៖ នាយទាហានជាន់ខ្ពស់ក្រសួងការពារជាតិមួយរូប គឺ លោកឧត្ដមសេនីយ៍ទោ បាន ប្រាក់ បានរងការចោទប្រកាន់ពី លោកតា ឡឹក ធន អាយុ ៧២ ឆ្នំា និង ប្រពន្ធឈ្មោះ ពាំង សុខ រស់នៅភូមិ ពពាលខែ ២ ឃុំ ដីឥដ្ឋ ស្រុក កៀនស្វាយ ខេត្ត កណ្ដាល ថាបាន ក្លែងឯកសារចង់បានដីលោកតា ទំហំ ១០ ហិកតា នៅភូមិ ពពាលខែ ឃុំ ដីឥដ្ឋ ស្រុក កៀនស្វាយ ខេត្តកណ្ដាល ។
នៅរសៀលថ្ងៃទី ១៨ ខែ មករា ឆ្នាំ ២០២០ លោកតា ឡឹក ធន បានរៀបរាប់ថា នៅឆ្នាំ ២០០៧ លោកតា និង ប្រពន្ធ បានយល់ព្រមលក់ដីមួយកន្លែងទំហំ ១០ ហិកតា នៅ ភូមិ ពពាលខែ ឃុំ ដីឥដ្ឋ ស្រុក កៀនស្វាយ ខេត្តកណ្ដាល អោយទៅឈ្មោះ បាន ប្រាក់ ក្នុងតម្លៃ ៣៥០០០ ដុល្លារ អាមេរិក ។ នៅថ្ងៃទី ១២ ខែ ធ្នូ ឆ្នាំ ២០០៧ ឈ្មោះ បាន ប្រាក់ បានកក់លុយសរុបចំនួន ៩០០ ដុល្លារ ។ ចំណែកលុយនៅសល់ ៣៤១០០ ដុល្លារទៀត ឈ្មោះ បាន ប្រាក់ សន្យាយកមកប្រគល់អោយនៅថ្ងៃទី ៣០ ខែ សីហា ឆ្នាំ ២០០៨ ។ លុះដល់ថ្ងៃកំណត់ ( ៣០ សីហា ២០០៨ ) ឈ្មោះ បាន ប្រាក់ មិនបានយកលុយមកប្រគល់អោយលោកតាឡេីយ ។
ដោយរង់ចាំយូរពេកមិនឃេីញឈ្មោះ បាន ប្រាក់ យកលុយមកប្រគល់អោយ នៅឆ្នាំ ២០១៥ លោកតា បានលក់ដីនេះអោយទៅឈ្មោះ យឹម ផៃភីវីវ៉ាន់នុត ។ ប៉ុន្តែពេលយកឯកសារទៅរត់ការផ្ទេរសិទ្ធ ស្រាប់តែឃេីញមានឯកសារមួយបង្ហាញថា លោកតា បានលក់ដីនោះទៅអោយឈ្មោះ ទេស សុផា តម្លៃ ១០០០០០ ដុល្លារ អាមេរិក ព្រមទាំងមានឯកសារ ៣ ច្បាប់ គឺ កិច្ចសន្យាទិញលក់ដីព្រមទាំងលិខិតធានាអះអាងនិង ទទួលប្រាក់គ្រប់ចំនួនដោយបានបញ្ជាក់ថា លោកតា និង ប្រពន្ធ ឈ្មោះ ពាំង សុខ ឈ្មោះ អាន អុល និង ប្រពន្ធឈ្មោះ ពាំង សុគឿន ឈ្មោះ ដៀប ណុច និង ប្រពន្ធឈ្មោះ ពាំង ស្រីហាច បានទទួលប្រាក់គ្រប់ចំនួន ចុះថ្ងៃទី ២០ ខែ ធ្នូ ឆ្នាំ ២០០៧ ។ លោកតា ឡឹក ធន បានបដិសេធចោលទាំងអស់ចំពោះលិខិតទាំងនោះហេីយបានអះអាងថា មិនដែលបានលក់ ឬ បានស្គាល់ឈ្មោះ ទេស សុផា សោះ មិនដឹងថា ទេស សុផា នោះ ស្រី ឬ ប្រុស ចាស់ ឬ ក្មេងផង ។
មិនតែប៉ុណ្ណោះ លោកផ្កាយពីរ បាន ប្រាក់ បានដាក់ពាក្យបណ្ដឹងប្ដឹង លោកតា ថែមទៀតផង ។ ចំណែកខាងមេភូមិ មេឃុំ បានធ្វើលិខិតបញ្ជាក់បន្ថែមថា លោកតា ឡឹក ធន និង ប្រពន្ធ ពិតជាបានលក់ដីទៅអោយឈ្មោះ ទេស សុផា កាលពីឆ្នាំ ២០០៧ ប្រាកដមែន ហេីយ នៅឆ្នាំ ២០១៥ ឈ្មោះ ទេស សុផា បានលក់ដីនេះបន្តទៅអោយលោក ឧកញ៉ា អ៊ូច ចាន់ថន កាន់កាប់រហូតមកដល់សព្វថ្ងៃ ។
ផ្ទុយពីការបញ្ជាក់អះអាងរបស់មេភូមិ មេឃុំ ត្រូវបានលោកតា ឡឹក ធន បានបដិសេធចោលដោយលោកតាបានអះអាងថា ដីទំហំ ១០ ហិកតា នេះ លោកតា នៅគ្រប់គ្រងអាស្រ័យផលរហូតមកដល់សព្វថ្ងៃ ។ លោកតា មិនដែលស្គាល់ឬឃេីញឈ្មោះ ទេស សុផា និង ឈ្មោះ ឧកញ៉ា អ៊ូច ចាន់ថន មកក្បែដីម្ដងណាឡេីយ ។
ដោយមេីលឃេីញអំពេីអយុត្តិធម៌ពេក ជាពិសេសមានការឃុបឃិតគ្នាជាប្រព័ន្ធរវាងអាជ្ញាធរភូមិ ឃុំ និង អ្នកមានអំណាច នៅថ្ងៃទី ២៧ ខែ កុម្ភៈ ឆ្នាំ ២០១៩ លោកតា បានដាក់ពាក្យបណ្ដឹងទៅ នគរបាលព្រហ្មទណ្ឌក្រសួងមហាផ្ទៃ និង បានស្នេីសុំអោយមានការធ្វេីកោសល្យវិច្ច័យ លេីលិខិតធានាអះអាងចុះថ្ងៃទី ២០ ខែ ធ្នូ ឆ្នាំ ២០០៧ ។
បន្ទាប់ពីទទួលបានពាក្យបណ្ដឹងរបស់លោកតា ឡឹក ធន នគរបាលព្រហ្មទណ្ឌក្រសួងមហាផ្ទៃ និង នគរបាល បច្ចេកទេស វិទ្យាសាស្រ្ត បានធ្វើ កោសល្យវិច្ច័យ រកឃើញថា លោកឧត្ដមសេនីយ៍ទោ បាន ប្រាក់ និង ឈ្មោះ ទេស សុផា អាចជាប់ពាក់ព័ន្ធក្នុងការប្រេីប្រាស់ លិខិតក្លែង និង ក្លែងលិខិតឯកជន ។
នគរបាលព្រហ្មទណ្ឌក្រសួងមហាផ្ទៃ បានបញ្ជូនសំណុំរឿងទៅ អយ្យការអមសាលាដំបូងខេត្តកណ្ដាលដេីម្បីចាត់ការបន្តតាមនិតិវិធីច្បាប់ ។
គិតមកត្រឹមរសៀលថ្ងៃទី ១៨ ខែ មករា ឆ្នាំ ២០២០ យេីងមិនអាចទាក់ទងសុំការបំភ្លឺពីលោកឧត្ដមសេនីយ៍ទោ បាន ប្រាក់ នាយទាហានជាន់ខ្ពស់ក្រសួងការពារជាតិ និង ឈ្មោះ ទេស សុផា នៅឡេីយទេ ព្រោះគ្មានលេខទំនាក់ទំនង ។
