សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន ក្រសួងមហាផ្ទៃ បង្ក្រាបករណីជួញដូរគ្រឿងញៀនឆ្លងដែន ពីឡាវមកកម្ពុជា ចាប់ខ្លួនឡាវ ២នាក់ និងរឹបអូសគ្រឿងញៀន ៤៦ គីឡូក្រាម ។
ស្ទឹងត្រែង ៖ អនុវត្តតាមបញ្ជាដ៏ម៉ឺងម៉ាត់របស់ ឯកឧត្តម នាយឧត្ដមសេនិយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និង ឯកឧត្តម នាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ របស់ ឯកឧត្តម ឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន ។
នៅថ្ងៃទី១៤ ខែមករា ឆ្នាំ២០២១ នៅវេលាម៉ោង២០ និង១០នាទី នៅចំណុចស្ពានទី២ ច្រករបៀង ស្ថិតក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង កម្លាំងជំនាញ(ក៩)នៃមន្ទីរប្រឆាំងបទល្មើសគ្រឿងញៀន ដឹកនាំដោយលោក យិន បញ្ញារិទ្ធ នាយករង មន្ទីរ និងលោក ដុសវណ្ណា សុវឌ្ឍន: នាយការិយាល័យ និងមានការស្នើសុំកម្លាំងជំនាញ នៃស្នងការដ្ឋាននគរបាលខេត្តស្ទឹងត្រែងចូលរួម ព្រមទាំងមានការសម្របសម្រួលពី ឯកឧត្ដម ជេត ខេមរា ព្រះរាជអាជ្ញានៃអយ្យការអមសាលាដំបូង បានដំណើរការ ស៊ើបអង្កេត ស្រាវជ្រាវ ជាច្រើនខែ និងឈាន បង្ក្រាបករណីជួញដូរគ្រឿងញៀនឆ្លងដែនខាងលើ ។
☆លទ្ធផល:
ក-ឃាត់ជនសង្ស័យ ២នាក់:
១-ឈ្មោះ អ៊ា ថ ភេទប្រុស អាយុ ២៩ឆ្នាំ ជនជាតិឡាវ។
២-ឈ្មោះ ទិន កែវ ភេទ ប្រុស អាយុ២៨ឆ្នាំ ជនជាតិឡាវ។
ខ-ចាប់យកវត្ថុតាង :
– ម៉េតំហ្វេតាមីន(ICE) ៤៦ ដុំធំ ទម្ងន់ប្រមាណ ៤៦គីឡូក្រាម ។
ជនល្មើស និង វត្ថុតាង សមត្ថកិច្ចកំពុងកសាងសំណុំរឿងបញ្ជូនទៅតុលាការចាត់ការតាមច្បាប់ ។
